ඕනෑම රටක් නිවැරදි විදිහට පාලනය වෙන්න,ඒ වගේම යහපත් සංවර්ධනයක් උදා කර ගන්න නම් ඒ රටට හොඳ දේශපාලනයක් තියෙන්ඩ ඕනෙ කියන එක මේ රටේ ඉන්න පොඩි ළමයට පවා තේරෙනවා.රටේ මිනිස්සු ඒ කියන්නෙ ඔයාලා අපි වගේ මහජනතාව ඡන්දයකින් තෝරගත්ත එක්කෙනෙක්ව විතරක් පාර්ලිමේන්තු යවන්නෙ රටේ මහජනතාව විදිහට අපේ ප්‍රශ්න කතා කරන්න අපි හැමෝටම පාර්ලිමේන්තුවට යන්න බැරි හින්දයි.
ඒ වුණත් දැන් දැන් මේ රටේ දේශපාලකයො කරන වැඩයි මාධ්‍ය ඉස්සරහට ඇවිත් ඒ දේවල් ගැන කියන දේවලුයි දැක්කහම අපි පාර්ලිමේන්තු යැව්වෙ මේ වගේ අං තියෙන අයද කියලා හිතෙනවා.අවුරුද්ද පටන් ගත්ත වෙලේ ඉඳලා ගිනි රස්නෙ කාෂ්ටක අවුවෙන් පිච්චුන මිනිස්සුන්ට ස්වභාවධර්මයත් නපුරු වෙලා වගේ එක පාරටම ගං වතුර,නාය යාම්,ජීවිත දේපල හානි මහ ගොඩක් දීලා යන්න ගියා.ඇත්තටම මේ හැම එකකින්ම බැට කන්නෙ ඔයාලා අපි වගේ සාමාන්‍ය මහජනතාව වෙන එක හරිම ඛේදජනකයි.අපි නිදහස ලබා ගත්ත දවසෙ ඉඳලම මේ රට ප්‍රධාන පක්ෂ දෙකක් පාලනය කළා.ඒත් ඒ පක්ෂ වල හිටිය දේශපාලකයො ගොඩක් වෙලාවට කරේ තමන්ගෙ ඩඩගෝස්තරවාදී සංකල්පය එළියට දාලා මහජනතාවගේ ප්‍රශ්න යට ගහපු එකයි.ඉතිහාසයේ එදා ඉඳලා අද වෙනකම් වෙන්නෙ ඒ තියරියම නේද?
රටේ ජනතාවගේ ඡන්දයෙන් පත් වුණ දේශපාලකයන් වුණහම කරන්න ඕන මූලිකම දේ තමයි රටේ ජනතාවට සේවයක් කරන එක.ඒ වුණත් අපේ රටේ දේශපාලකයන්ට බලයට පත් වෙලා සතියක් යන්නත් කලින්ම ඒ හැමදේම අමතක වෙලා තමන් වටේට පුළුවන් තරම් බලය,ධනය ගොඩනඟා ගන්න එක ප්‍රධාන අරමුණ වෙනවා.ඇමති මණ්ඩලය 20,30 ට සීමා කරනවා කියලා පොරොන්දු වුණ පාලන අධිකාරිය මේ වෙනකොටත් ඒ වගේ හතර පස් ගුණයක් වැඩි කරගෙන තියෙනවා.ඉතින් මේ අති විශාල ඇමති මණ්ඩලයේ වියදම් දරන්න ඕන මේ රටේ බදු ගෙවන ජනතාව.ඒ වගේම 11%වෙලා තිබුණ වැට් බද්ද 15% වෙනකම් මේ වෙනකොට වැඩි කරලා ඉවරයි.අපි බොන ප්ලේන්ටියේ,කන බත් පැකට් එකේ,ලෙඩකට ගන්න බෙහෙත් පෙත්ත මේ හැම දේම ගණන් වැඩි වෙලා.එක වේලක් කාලා අනිත් වේල කන්නෙ කොහොමද කියන එක දස අතේ කල්පනා කරන්න වෙලා තියෙනවා.ඒ සේරම අස්සෙ පාර්ලිමේන්තු යන අපේ දේශපාලකයන් කරන්නෙ තමන්ට කවත් සැප වාහන ගන්න පාර්ලිමේන්තුවෙන් සල්ලි වෙන්කර ගන්න එක.ඇමතිවරු ඒ වගේ ආත්මාර්ථකාමී වෙලා සල්ලි වෙන් කර ගනිද්දී දුප්පත් මිනිසුසුන්ගෙ වාහනේ වෙන ත්‍රීවීල් එකෙත් ගාන අපිට දරන්ඩ බැරි තරමටම වැඩි කරලා තියෙනවා.ඒ අස්සෙ ප්‍රසිද්ධඇමතිවරු මාධ්‍ය ඉස්සරහට ඇවිත් වාහන වල බදු වැඩි කරපු එක ගැන ගොන් පාට් කථා කියනකොට මේ රට පාලනය කරන පාලකයන්ගෙ ඔළුව කියන දේ ඇතුළෙ තියෙන මොළේ නැත්තටම නැති වෙලාද කියලත් හිතෙනවා.බලයට ආපු දවසෙ ඉඳලම ප්‍රධාන මාතෘකාව වුණ හොරු ඇල්ලීම මේ වෙනකොට කවදාවත්ම වෙන්නෙ නැති බව අපට තේරෙනවා.ඒකට හේතුව වෙන්නෙ මේ රටේ ඉන්න ලොකුම හොරු ටික ඉන්නෙ පාර්ලිමේන්තුවෙ හින්දා.කැලේ මාරු වුණාට කොටියාගේ පුල්ලි මාරු වෙන්නෑ කියලා අපේ ජන වහරෙ එන කියමනක් තියෙනවා.ඉතින් අපට දැන් පැහැදිලි වෙන්නෙත් ඒකම නේද?සිද්ධ වෙලා තියෙන්නෙ පාලනය මාරු වීමක් විතරයි.දෙපැත්තෙම ඉන්නෙ දූෂකයන්ය.දෙපැත්තට බෝලය පාස් කරන න්‍යාය තවමත් සිද්ධ වෙන්නෙ කිසිම වෙනසක් නැතුව.අපි තාමත් රැවටෙනවා.අධ්‍යාපනය,සෞඛ්‍ය හැමදේම පෞද්ගලීකරණය වෙනවා.මේ හැමදේම දරා ගන්ඩ සිද්ධ වෙන්නෙ මේ රටේ මහජනයාටයි.අපිට අපි ගන්න තීරණ හරිද වැරදිද කියලා හිතන්න මේ වෙනකොටත් ගොඩක් දේවල් සිද්ධ වෙලා තියෙනවා.අපි හැමෝගෙම ඇස් බැඳලා තියෙන කඩතුරාව ලිහන්න කාලය ඇවිත්.
No comments:
Post a Comment